Jól

Skoppa og Skrítla árita jóladagatalið í Kringlunni

Skoppa og Skrítla verða í Kringlunni um helgina og árita Jóladagatalið. Þær verða í miklu stuði og taka á móti hressum krökkum á laugardag milli klukkan 15 og 17 og á sunnudag milli klukkan 13 og 14.15. Skoppa og Skrítla, opna glænýjan glugga á jóladagatalinu á hverjum degi frá og með 1. desember og fram að jólum á Stöð 2. Úr dagatalinu draga þær fram orð sem tengjast jólunum og jólaundirbúningi. Orð dagsins tekur á sig ýmsar myndir og tóna og leikurinn berst út um víðan völl. Orðin eiga það öll sameiginlegt að börn heyra þau notuð í aðdraganda jóla en vantar gjarnan að vita hvað þau virkilega þýða. Skoppa og Skrítla vita alls ekki hvað öll þessi orð þýða svo þær fá aðstoð frá Barnaorðabókinni og að sjálfsögðu frá vinkonu sinni henni Lúsí. Bakari Svakari lætur sig ekki vanta í jólabaksturinn, jólasveinninn gægist mjög líklega inn um gluggann, Snæfinnur snjókarl tekur lagið og jólaenglar svífa um svell. Líkt og áður þá skipar tónlist og dans stóran þátt hjá Skoppu og Skrítlu og enginn ætti að fara í jólaköttinn við að aðstoða þær í leitinni að sönnum kærleiksanda jólanna. Jóladagatal Skoppu og Skrítlu er á dagskrá Stöðvar 2 á hverjum degi fram að jólum fyrir fréttir.





Velkomin á Vísi. Þessi vefur notar vafrakökur. Sjá nánar.