Lars von Trier og Peter Aalbæk í vafasömu fasteignabraski

Danski leikstjórinn Lars von Trier og framleiðandi hans Peter Aalbæk létu starfsmenn kvikmyndafélags síns vera í ábyrgð fyrir lánum sem þeir notuðu í fasteignabrask án þess að starfsmennirnir vissu af því.

Politiken segir frá þessu en upphaf málsins má rekja aftur til ársins 2006. Þá samþykktu starfsmenn kvikmyndafélagsins Zentropa að verða hluthafar og kaupa nær helmingshlut í kvikmyndagerð félagsins á móti þeim Lars von Trier og Peter Aalbæk.

Það sem gerist svo árið eftir er að Aalbæk skrifar undir lánasamninga í nafni dótturfélags Zentropa vegna fasteignakaupa þar sem þessir nýju hluthafar í Zentropa eru gerðir ábyrgir fyrir lánum upp á 12,5 milljón danskra króna eða hátt í 300 milljón króna án þess að hafa hugmynd um það.

Þeir Lars von Trier og Aalbæk notuðu svo lánin til að braska með fasteignir í Avedøre einu af úthverfum Kaupmannahafnar. Þeir munu hafa grætt þó nokkrar milljónir danskra króna á þeim viðskiptum.

Talsmaður starfsmannanna er æfur af reiði vegna málsins enda hefðu lánin getað lent í fanginu á starfsmönnunum. Aalbæk segir í samtali við Politiken að samningur hefði verið til um að starfsmennirnir myndu ekki bera skaða af lánunum en hann getur ekki lagt fram þann samning.