Segir verstu hliðar kreppunnar ekki komnar fram

Stjórnvöld ríkja í Evrópu og Bandaríkjunum verða að grípa til meira afgerandi aðgerða í baráttu sinni við skuldavandann, segir Christine Lagarde, framkvæmdastjóri Alþjóðagjaldeyrissjóðsins. Hún segir tímann ekki vinna með stjórnvöldum.

Framkvæmdastjóri Alþjóðagjaldeyrissjóðsins, hin franska Christine Lagarde, segir að enn séu verstu hliðar efnahagsþreninga í Evrópu ekki komnar fram, þar sem áhrif af miklum niðurskurði opinberra útgjalda muni til skamms tíma dýpka vandamál ríkja í álfunni. Það muni reyna á heimsálfuna, en aðgerðirnar séu nauðsynlegar til lengri tíma litið.

Lagarde segir þó að ekki hafi enn verið gripið til nægilega róttækra aðgerða þegar kemur að skuldavandanum, því lykillinn að árangri til lengri tíma felist í því að klára lagabreytingar og aðgerðir fljótt og vel, svo að kastljósið geti farið að beinast að því hvernig megi auka hagvöxt.

Lagarde segir að þetta eigi ekki síður við um Bandaríkin, þar sem mikilvægt sé að grípa til aðgerða sem séu sannfærandi og til þess fallnar að bæta úr bágri fjárhagsstöðu ríkissjóðs. Sérstaklega þurfi stjórnmálamenn að vera meðvitaðir um að hringlagaháttur í ríkisfjármálum, áður en nýtt fjárlagaár hefst í byrjun næsta árs, geti dýpkað vandann og grafið lánstrausti á fjármálamörkuðum.

Sjá má umfjöllun BBC um þessi mál, auk vanda Grikklands, hér.