Spánverjar þurfa minna fé til að bjarga bönkum sínum

Christine Lagarde, framkvæmdastjóri Alþjóðagjaldeyrissjóðsins segir að Spánverjar þurfi minna lánsfé til að bjarga bankakerfi sínu en talið var að þeir þyrftu í sumar. Lánsfjárþörfin sé nær 40 milljörðum evra en þeim 100 milljörðum evra, eða um 16.000 milljörðum kr., sem rætt var um í sumar.

Þetta kemur fram í viðtali við Lagarde í Wall Street Journal. Spánverjar munu þó þurfa að bíða enn í töluverðan tíma með að fá þetta fé eða þar til samræmdar reglur um bankaeftirlit innan Evrópusambandsins hafa verið samþykktar. Slíkt gerist vart fyrr en á næsta ári.