Hagnaður Íslandsbanka eykst um 3,5 milljarða milli ára

Hagnaður Íslandsbanka eftir skatta á fyrstu sex mánuðum ársins var 11,6 milljarðar kr. samanborið við 8,1 milljarð kr. á fyrsta árshelmingi í fyrra.

Aukinn hagnaður bankans skýrist einkum af endurmati á lánasafni hans sem og salan á hlut bankans í Icelandair.

Í tilkynningu segir að arðsemi eigin fjár eftir skatta var 17,9% á tímabilinu, samanborið við 12,9% á fyrsta árshelmingi 2011. Arðsemi tímabilsins af reglulegri starfsemi var 11,1% á þessum árshelmingi, samanborið við 12,4% sama tímabil árið 2011.

Þá kemur fram að um 18.700 einstaklingar og um 3.200 fyrirtæki hafa fengið afskriftir, eftirgjafir eða leiðréttingar á skuldum frá stofnun bankans sem nemur um 394 milljörðum króna.

Heildareignir bankans við lok fyrsta árshelmings námu 789,9 milljörðum kr. , samanborið við 792,4 milljarða kr. í lok mars 2012.

"Hálfsársuppgjörið endurspeglar vel fjárhagslegan styrk bankans. Íslandsbanki skilar góðri arðsemi, lausafjárstaða er mjög sterk og eiginfjárhlutfall bankans er, líkt og fyrr, vel yfir lágmarkskröfum Fjármálaeftirlitsins," segir Birna Einarsdóttir, bankastjóri Íslandsbanka í tilkynningunni.

„Útlánaeftirspurn fer vaxandi og hafa ný útlán til einstaklinga og fyrirtækja aukist á tímabilinu. Þá hefur ERGO, fjármögnunarþjónusta Íslandsbanka, veitt jafn mikið af nýjum útlánum á fyrsta helmingi þessa árs og allt síðasta ár.

Verkefnastaða tengd markaðsviðskiptum og fyrirtækjaráðgjöf er sterk og allt stefnir í að þau verkefni muni hafa jákvæð áhrif á þróun og uppbyggingu hlutabréfa- og fjármálamarkaðar á næstu misserum. Íslandsbanki seldi 10,29% hlut í Icelandair Group hf. á tímabilinu en það samræmist stefnu okkar að minnka eignarhluti í félögum óskyldum rekstri."