Apple og Google leggja niður vopn í einkaleyfadeilu

Talið er að tæknirisarnir Apple og Google hafi nú samið um vopnahlé en stjórnarformenn og aðrir háttsettir stjórnendur fyrirtækjanna hafa fundað síðustu daga um hönnun snjallsíma og vernd hugverka.

Apple og Suður-Kóreski raftækjaframleiðandinn Samsung hafa tekist á í dómssölum víða um heim. Fyrirtækin saka hvort annað um að hafa brotið lög um hugverkavernd.

Málin hverfast um hönnun og virkni stýrikerfa sem fyrirtækin nota í snjallsímum sínum. Apple notast við iOS stýrikerfið en það knýr bæði iPhone snjallsímana og iPad spjaldtölvuna. Ólíkt Apple hefur Samsung ekki þróað sitt eigið stýrikerfi og einblínir þess í stað á vélbúnað. Samsung notar því Android-stýrikerfið í langflestum vörum sínum.

Samsung var dögunum gert að greiða Apple rúmlega milljarð dollara í skaðabætur vegna brota á lögum um hugverkavernd. Apple hefur nú farið fram á að lögbann verið sett á nokkra snjallsíma Samsung í Bandaríkjunum.

Nú er talið að Google og Apple hafi komist að samkomulagi um að leggja niður vopn í einkaleyfisdeilunni.