Nýjar höfuðstöðvar Facebook slá öllu við

Facebook heldur áfram að vaxa, en í þetta sinn eru það híbýli fyrirtækisins sem stækka. Nýverið tilkynnti fyrirtækið að stjörnu-arkitektinn Frank Gehry myndi hanna nýjar höfuðstöðvar Facebook ætlaðar fyrir 3.400 starfsmenn.

Höfuðstöðvarnar verða „klæðskerasniðnar" að þörfum Facebook. Þær verða í raun ein risavaxin skrifstofa. Þar ofan á verður þakgarður og auk þess verða ýmiss konar ráðstefnusalir og lokuð rými hér og þar í byggingunni. En fyrst og fremst er um eitt risastórt rými að ræða.

Arkitektinn Frank Gehry er þekktur fyrir að fara að óskum viðskiptavina sinna án þess að kostnaðurinn fari fram úr öllu valdi.

„Ég er mjög spenntur fyrir því að vinna með Gehry. Hugmyndin er að skapa hið fullkomna vinnusvæði: eitt risavaxið herbergi sem rúmar þúsundir manna, þar sem nándin verður nægilega mikil til að allir geti unnið saman. Þetta verður stærsta vinnusvæðið af þessari tegund í heimi. En auk þess verða hljóðlátari herbergi. Að utan mun húsið svo líta út nokkurn veginn eins og venjulegur hóll í náttúrunni," segir Mark Zuckerberg, stofnandi Facebook.

Zuckerberg gerir líka ráð fyrir að samstarfið við Gehry muni spara fyrirtækinu fjármuni þar sem Gehry er þekktur fyrir gott skipulag. „Svo við búumst við að þessi bygging verði ótrúleg en samt ekki sérlega dýr," segir hann.