Hrun tölvukerfis Royal Bank of Scotland kostar 125 milljónir punda

Hrun tölvukerfis Royal Bank of Scotland er að reynast bankanum dýrkeypt, en upplýst var um það í dag að bankinn þarf að greiða völdum viðskiptavinum bankans 125 milljónir punda, eða sem nemur 23,75 milljörðum króna. Vegna hruns tölvukerfisins lentu viðskiptavinir bankans í erfiðleikum með að nálgast fjármuni sína yfir tveggja vikna tímabil í júní, með fyrrgreindum afleiðingum fyrir bankann.

Um þetta var upplýst þegar bankinn tilkynnti um afkomu sína á fyrstu sex mánuðum ársins, en bankinn tapaði 1,5 milljarði punda á því tímabili. Á sama tímabili í fyrra tapaði bankinn 794 milljónum punda, eða sem nemur ríflega 15 milljörðum króna.

Tekjur bankans á fyrrnefndu tímabili féllu um 8 prósent frá fyrra ári, og námu 13,2 milljörðum punda, jafnvirði 2.500 milljarða króna.

Breska ríkið á mikla hagsmuni undir þegar kemur að Royal Bank of Scotland en ríkið þjóðnýtti 82 prósent hlut í bankanum haustið 2008, eftir fall Lehman Brothers, og er nú sagt leita leiða til þess að kaupa afganginn af hlutafénu til þess að auka líkur á því að geta selt bankann innan næstu tveggja ára, eins og að er stefnt.

Sjá má frétt breska ríkisútvarpsins BBC um málið, hér.