Björt framtíð Íslands sem matvælaframleiðenda

Framtíðin er björt fyrir Íslendinga sem fiskveiðiþjóð ef marka má sameiginlega skýrslu OECD og FAO Matvælastofnunnar Sameinuðu þjóðanna um þróun matvælaframleiðslu heimsins til ársins 2021.

Í þeim kafla skýrslunnar sem fjallar um matvælaframleiðsluna í sjávarútvegi kemur fram að verð á fiski muni fara hækkandi á næsta áratug en jafnframt að framleiðsla á sjávarafurðum muni aukast.

Aukningin verður þó nær eingöngu byggð á eldisfiski. Veiðar munu standa í stað eða jafnvel dragast saman enda eru margir nytjastofnar heimsins við þolmörkin, eða yfir þeim, hvað varðar sóknina í þá.

Fiskur stendur undir sívaxandi hlutfalli af próteinþörf mannkynsins. Raunar fær heimurinn í dag meira af próteini úr fiski en hvort sem er úr kjúklinga-, nauta-, eða svínakjöti.

Í skýrslunni segir að framleiðsla á sjávarafurðum muni vaxa um 15% á heimsvísu fram til ársins 2021. Þar af muni framleiðsla á eldisfiski vaxa um 33% á sama tíma. Það þýðir að árið 2018 og þar eftir muni yfir helmingur af fiskneyslu í heiminum koma úr eldisfiski.