Hlutabréf í Facebook aftur í frjálsu falli

Ekkert lát er á hremmingum eigenda Facebook hlutabréfa en þau voru nánast í frjálsu falli á Nasdag markaðinum í New York í gærkvöldi.

Við lokun markaðarins höfðu þau fallið um rúmlega 8% í verði. Þar með hafa bréfin misst 26% af andvirði sínu frá því að Facebook var skráð á markaðinn í maí s.l.

Laura Martin greinandi hjá Needham & Co segir í samtali við Bloomberg fréttaveituna að verðfallið í gærkvöldi hafi einkum stafað af því að margir fjárfestar vildu selja bréf sín áður en uppgjör Facebook fyrir annan ársfjórðung verður birt þann 26. júlí n.k.