Ekkert lát á verðhækkunum á olíu

Heimsmarkaðsverð á olíu heldur áfram að hækka og er tunnan af Brent olíunni komin í tæpa 106 dollara og hefur hækkað um 2 dollara síðan í gærdag. Samsvarandi hækkanir hafa orðið á bandarísku léttolíunni sem nú er komin aftur yfir 90 dollara á tunnuna.

Það er eins og oft áður efnahagstölur frá Bandaríkjunum sem kynda undir hækkanir á olíuverðinu. Hækkanir á Asíumörkuðum í nótt komu til vegna þess að veltan á fasteignamarkaðinum vestan hafs hefur tekið vel við sér í júní og seldust þá 6.9% fleiri fasteignir en í sama mánuði í fyrra og hefur salan ekki verið meiri í einum mánuði undanfarin fjögur ár.

Þá spilar einnig inn í að meira gekk á olíubirgðir Bandaríkjanna í síðustu viku en sérfræðingar áttu von á. Þetta tvennt þykir merki um að efnahagur Bandaríkjanna sé tekinn að rétta úr kútnum en Bandaríkjamenn nota rúmlega fimmtung af allri olíu sem framleidd er í heiminum.