Haglél eyðilagði stóran hluta af kampavínframleiðslu ársins

Útlit er fyrir að skortur verði á kampavíni í ár og fram eftir næsta ári eftir að stór hluti af kampavínsuppskerunni fór forgörðum.

Gífurlegt haglél sem reið yfir Champagne héraðið í Frakklandi í gærdag hefur eyðilegt að mestu kampavínsframleiðsluna þetta árið og menn óttast að um þriðjungur uppskerunnar á næsta ári sé einnig ónýtur.

Um er að ræða þriðja versta haglélið í sögunni á þessum slóðum en mestu skemmdirnar urðu á Pinot Noir vínekrunum sem ná yfir 670 hektara. Þar af eyðilögðust algerlega 100 af 109 hekturum í Urville og þar mun vínviðurinn ekki gefa af sér nein ber í ár.

Þrátt fyrir að birgðastaða nokkurra af þeim sem framleiða kampavín sé góð þessa stundina er ljóst að fjárhagstjón þeirra er mjög mikið og reikna má með skorti á frönsku kampavíni í ár og fram eftir næsta ári.

Einn vínbóndinn, Michel Drappier, segir að bændurnir í Champagne fylgist nú náið með hverju skýi á himninum fyrir ofan þá.