Papademos: Fyrir alla muni haldið ykkur við áætlunina!

Lucas Papademos, fyrrverandi forsætisráðherra Grikklands, segir að Grikkir verði, fyrir alla muni, að halda sig við áætlunina í ríkisfjármálum sem samþykkt var af Evrópusambandinu, Alþjóðagjaldeyrissjóðum, stjórnvöldum í Grikklandi og kröfuhöfum landsins. Einhver önnur leið muni dýpka vandamál landsins til muna og valda stórkostlegu víðtæku efnahagstjóni í Evrópu.

Papademos, sem starfaði sem hagfræðingur hjá Seðlabanka Evrópu áður en hann tók við forsætisráðherraembættinu sem ráðherra utan þings, sagði í ræðu sem vitnað er til á vef Wall Street Journal að hugmyndir um upptöku drökmunnar að nýju væru óraunhæfar og geti aðeins skapað meiri vanda.

Hann sagði enn fremur að sú áætlun sem þegar lægi fyrir væri sársaukafull, en hún væri langtímamiðuð. Næsta kynslóð Grikkja myndi þakka fyrir þessar aðgerðir, þó stjórnmálamenn á þessum tíma næðu því ekki. Einmitt þess vegna skipti máli að vinna eftir áætluninni, sem m.a. felur í sér mikinn niðurskurð ríkisútgjalda og lækkun lífeyrisskuldbindinga.

Atvinnuleysi á Grikklandi mælist nú ríflega 20 prósent.

Sjá má umfjöllun Wall Street Journa um ræðu Papademos hér.