Tim Cook afþakkaði 75 milljónir dollara

Tim Cook, stjórnarformaður Apple, afþakkaði 75 milljón dollara eða um 9.8 milljarða króna arðgreiðslu á dögunum. Þetta gerði hann ásamt öðrum starfsmönnum Apple sem eiga hlutbréf í fyrirtækinu.

Apple á um 100 milljarða dollara eða um 13 þúsund milljarða króna í lausafé. Þessir gríðarlegu fjármunir eru bein afleiðing af ótrúlegri velgengni Apple á síðustu árum.

Fyrir nokkru ákvað stjórn Apple að greiða út arð í fyrsta skipti í 17 ár. Fyrrverandi stjórnarformaður fyrirtækisins, Steve Jobs, var ávallt mótfallinn slíkum greiðslum. Þegar Cook tók við störfum var áherslunum þó breytt.

Cook á 1.1 milljón hluti í Apple en um 935 milljón hlutir eru skráðir á markað. Markaðsvirði hluta Cook nemur tæpum 620 milljónum dala eða um 80 milljörðum íslenskra króna.

Cook á þó fyrir salti í grautinn enda nema árslaun hans 900 þúsund dollurum eða um 116 milljónum króna. Þetta eru töluvert hærri laun en forveri hans, Steve Jobs, var með á ári en hann ákvað að hentug laun væru einn dollari eða tæpar 130 krónur.