JP Morgan tapar ótrúlegum upphæðum

Stærsti banki Bandaríkjanna, JP Morgan Chase hefur greint frá tapi upp á heila tvo milljarða dollara eða 250 milljarða króna vegna flókinna skuldabréfaviðskipta sem ekki gengu upp. Fregnirnar koma flestum á óvart en búist er við að heildartap bankans á öðrum ársfjórðungi muni nema 800 milljónum dollara eða um 100 milljörðum króna, að að mestu vegna fyrrnefndra viðskipta.

Jamie Dimon, forstjóri JP Morgan, greindi frá tapinu í gær og varaði hann við því að tap bankans gæti numið allt að milljarði dala á öðrum ársfjórðungi vegna þessa. Hlutabréf í bankanum féllu um sex prósent í nótt, á eftirmarkaði, og fylgdu bréf annarra banka í kjölfarið.

Dimon sagði skuldabréfaviðskiptin hafa verið illa framkvæmd, ekki hugsuð í þaula og því hafi þetta „veðmál“ ekki gengið upp.

New York Times og Wall Street Journal segja viðskiptin hafa komið eins og þruma úr heiðskíru lofti á markaðnum, og hafi grafið undan trausti á stjórnendum bankans meðal stórra hluthafa.