Statoil styrkir sig við Grænland

Norski olíurisinn Statoil, þar sem norska ríkið fer með tæplega 70% hlutafjár, hefur keypt 30% hlut í félagi sem hefur leyfi til olíurannsókna við Grænlandsstrendur af Cairn Energy. Frá þessu greint á vefsíðu breska ríkisútvarpsins BBC í dag.

Ástæðan fyrir þessu er sögð sú, að Cairn vill vinna að rannsóknum á svæðinu í samvinnu við fyrirtæki sem hefur sérþekkingu á olíurannsóknum á Norðurslóðum. Ekkert félag hefur meiri reynslu eða þekkingu á þessum hlutum en Statoil.

Kostnaður Cairn Energy vegna rannsókna á árinu 2011 var töluvert meiri en gert var ráð fyrir fyrir, en heildarkostnaður fór yfir 400 milljónir punda, eða sem nemur tæplega 77 milljörðum króna.

Simon Thomson, forstjóri Cairn, segir í viðtali við BBC að reynsla Statoil auki líkurnar á því að starfsemin við Grænlandi skili hagnaði í framtíðinni.