Hagfræðiprófessor segir leiknum lokið fyrir Grikkland

Steve Hanke hagfræðiprófessor við John Hopkins háskólann segir að leiknum sé lokið fyrir Grikkland. Engu máli skiptir þótt Grikkir fái þá aðstoð sem er í boði.

Þetta kom fram í máli Hanke á ráðstefnu um skuldakreppu þjóða í New York en hún var haldin á vegum Bloomberg fréttaveitunnar. Hanke segir að leiknum sé lokið fyrir Grikki og að hagkerfi landsins muni hrynja til grunna í takt við sífellt vaxandi samdrátt í landsframleiðslu þess.

Grikkland á í samningaviðræðum við kröfuhafa sína um að minnka opinberar skuldir landsins niður í 120% af landsframleiðslunni árið 2020. Það er engan veginn nóg að mati Hanke.

Hagfræðiprófessorinn segir að allir útreikningar um skuldir Grikklands hafi verið rangir frá upphafi. Peningamagn í umferð í Grikklandi hafi minnkað um 16% á hverju ári undanfarin ár og það þýðir að ekki sé til staðar nægilegur vöxtur í landinu til að standa undir afborgunum af skuldum þess.