„Heimurinn“ er að sökkva í hafið

The World eða Heimurinn ein metnaðarfyllsta byggingarframkvæmd í Dubai er að sökkva í hafið. Á sínum tíma var framkvæmdin kynnt sem eitt af undrum veraldarinnar og dró að sér fólk á borð við Brad Pitt, Angelinu Jolie, Rod Steward og David Beckham.

The World samanstendur af fjölda tilbúinna smáeyja undan strönd Dubai sem saman mynda landakort af heiminum. Ætlunin var að auðmenn gætu keypt sér stakar eyjur.

Fjármálakreppan stöðvaði framkvæmdir við The World í miðjum klíðum og aldrei náðist að ljúka verkinu. Í dag er aðeins búseta á einni af eyjunum, það er „Grænlandi".

Fyrir utan að eyjurnar sjálfar eru smátt og smátt að brotna niður og sökkva í hafið hafa siglingarleiðirnar á milli þeirra verið að fyllast af sandi.

Í frétt um málið í Jyllands Posten segir að þótt enn séu áform um að klára byggingu The World hafa ýmsir fjárfestar, sem keyptu sér eyju, átt slæma daga. Þannig framdi John O´Dolan sjálfsmorð en hann keypti „Írland" fyrir rúma fjóra milljarða kr. Og Safi Qurashi sem borgaði um 7,5 milljarða fyrir „Stóra Bretland" situr nú í fangelsi í Dubai vegna fjármálaglæpa.