Mikill þrýstingur á að opna ný olíusvæði í Noregi

Mikill þrýstingur er nú á norsk stjórnvöld að þau opni ný svæði til olíuleitar á norska landgrunninu. Landssamtök olíuiðnaðarins í Noregi (OLF) krefjast þess að Stórþingið taki málið á dagskrá.

Í frétt um málið á vefsíðunni offshore.no er greint frá nýju mati norska Olíuráðsins um olíuvinnsluna þar í landi á næstu árum sem kynnt var í vikunni. Samkvæmt því hefur áætlað magn óunninnar olíu á norska landgrunninu minnkað um 20% frá síðasta mati. Þá minnkaði framleiðslan á olíu og gasi á síðasta ári þrátt fyrir að iðnaðurinn keyrði á fullum afköstum.

Alfred Nordgård einn af leiðtogum OLF segir að olíuframleiðsla Norðmanna hafi minnkað um 40% frá því að hún náði toppinum fyrir áratug síðan. Sú þróun ætti að vera alvarleg aðvörun fyrir norska ráðamenn.

„Til að tryggja áframhaldandi vinnslu og þróun í olíuiðnaðinum verður olíugeirinn að fá aðgang að nýjum leitarsvæðum," segir Nordgård. „Aðgangur að svæðunum fyrir utan Lofoten og Vesterålen er það sem iðnaðurinn þarfnast til að byrja með."