Gjaldþrotahrina ógnar einkaspítölum í Danmörku

Fjöldi einkaspítala í Danmörku rambar nú á barmi gjaldþrots. Þetta kemur fram í Börsen en ástæðan fyrir þessu er minnkandi eftirspurn eftir þjónustu spítalanna og lægri greiðslur frá hinu opinbera.

Í fyrra var töluverð umræða í Danmörku um að hið opinbera greiddi of háar upphæðir fyrir þá þjónustu sem keypt var af einkaspítölum. Jakob Axel Nielsen forstjóri Aleris Privathospitaler og fyrrum heilbrigðisráðherra segir að hann eigi erfitt með að sjá að hið opinbera hafi greitt of mikið fyrir þjónustuna þar sem allir einkaspítalar Danmerkur séu nú reknir með tapi.

Fram kemur í máli Nielsen að hann telur að fjöldi einkaspítala munu loka og að aðeins þeir fjársterku muni lifa af.

„Þeir sem eru minni munu annaðhvort verða gjaldþrota eða sameinast því það er nauðsynlegt að reka stórar einingar á þessu sviði til að endar nái saman," segir Nielsen.

Bent Wulff Jakobsen formaður Samtaka einkapítala í Danmörku er sammála mati Nielsen. Eftir erfitt ár í fyrra stefni í að árið í ár verði enn verra.