Segja Papandreú varpa frá sér ábyrgðinni

Grikkir virðast margir líta svo á að Georg Papandreú forsætisráðherra ætli sér að kúga þjóðina til hlýðni með því að bera samkomulag stjórnarinnar við Evrópusambandið undir þjóðaratkvæðagreiðslu.

„Þetta er fáránlegt. Nú hafa þeir sent boltann til okkar, en er það ekki þeirra ábyrgð að taka ákvörðunina?“ hefur gríska dagblaðið E Kathimerini eftir Haris Velakoutakou, 64 ára gömlum ferðaleiðsögumanni í Aþenu.

Stjórnarandstaðan hefur sömuleiðis brugðist ókvæða við ákvörðun forsætisráðherrans og tveir þingmenn Sósíalistaflokksins hafa sagt sig úr honum, með þeim afleiðingum að stjórnarmeirihlutinn er orðinn mjög tæpur.

Papandreú tilkynnti um ákvörðun sína á þriðjudag, en daginn áður hafði hann boðað atkvæðagreiðslu á þingi um stöðu stjórnarinnar. Reiknað er með að þingið gangi til atkvæða seint á föstudag, og ræðst þá hvort stjórnarmeirihlutinn fellur.

Hann hefur hins vegar ekki gefið upp neina tímasetningu fyrir þjóðaratkvæðagreiðsluna, að öðru leyti en því að hún verði eftir að Evrópusambandið hefur endanlega gengið frá útfærslu björgunaraðgerða sinna, sem meðal annars fela í sér helmings niðurfellingu á skuldum Grikkja og yfir hundrað milljarða evra fjárhagsaðstoð til viðbótar þeirri, sem áður hafði verið ákveðin.

Mikil andstaða er meðal almennings við björgunaraðgerðir ESB og niðurskurðaráform stjórnarinnar, en felli þjóðin björgunaraðgerðirnar aukast mjög líkur á greiðslufalli Grikklands og hruni evrunnar. Papandreú hefur engu að síður ákveðið að taka áhættuna. - gb