Fersk innkoma hjá Gauta

Tónlist. Bara ég, Emmsjé Gauti

Íslenskt rapp er á uppleið, að minnsta kosti ef við dæmum út frá útgefnum plötum, spilun og sölu. Gauti Þeyr Másson, betur þekktur sem Emmsjé Gauti, er búinn að vera lengi að, var til dæmis valinn efnilegasti rapparinn á Rímnaflæði 2003, 14 ára gamall.

Hann hefur sent frá sér nokkur lög undanfarin ár, en vakti fyrst verulega athygli í fyrra fyrir lagið Við elskum þessar mellur sem hann gerði með BlazRoca og var á plötunni Kópacabana.

Nú er Gauti kominn með sína fyrstu sólóplötu, Bara ég. Það er Geimsteinn í Keflavík sem gefur út, en Geimsteinn virðist vera eina stóra plötuútgáfan sem sinnir rappinu.

Emmsjé Gauti er fínn rappari. Hann hefur ágæta rödd og lipurt flæði. Textarnir eru sjálfhverfir eins og hjá fleiri röppurum, en Gauti kann að koma fyrir sig orði og á oft fína spretti. Tónlistin er mjög poppuð og dansvæn á köflum.

Á meðal bestu laganna má nefna Dusta rykið sem Gnúsi Yones gerði taktinn við og Berndsen og Rósa Sometime koma fram í, Blikk blikk sem Ljósvaki samdi, Steinstjarna og Hemmi Gunn sem eru gerð af Redd Lights og Kæra Ester sem fyrrnefndur Gnúsi á heiðurinn af. Á meðal gesta á plötunni eru Blaz Roca sem fer á kostum í laginu Hemmi Gunn, Friðrik Dór sem syngur í Okkar leið og Smári Tarfur sem lætur gítarinn tala í Blikk blikk.

Á heildina litið er Bara ég fersk og fagmannlega unnin plata. Góð blanda af poppi og rappi.

Niðurstaða: Emmsjé Gauti kemur ferskur inn á poppaðri rappplötu.