Sjælsö reiknar með að reksturinn verði á sléttu í ár

Sjælsö Gruppen reiknar með því að rekstur félagsins verði á sléttu í ár, það er að hagnaður ársins verði 0 kr. fyrir skatta og hugsanlegar afskriftir. Skattar og afskriftir nemi hinsvegar um 240 milljónum danskra kr. fyrir árið í fyrra.

Í frétt um málið í Jyllands Posten kemur fram að Sjælsö reiknar ekki með að gjaldþrot Amagerbanken hafi umtalsverð áhrif á reksturinn. Á síðasta ári tókst Sjælsö að afla sér 1,3 milljarða danskra kr. eða yfir 26 milljarða kr. með sölu á nýjum verkefnum.

Í tilkynningu til kauphallarinnar í Kaupmannahöfn kemur fram að markaðaðstæður hafi þróast í jákvæða átt fyrir Sjælsö.

Sjælsö Gruppen er stærsta fasteignafélag Danmerkur. Stærsti hluthafinn í Sjælsö er SG Nord Holding með 25% hlut. SG Nord Holding er svo aftur að hluta til, eða 30%, í eigu Cube Properties sem er skráð til heimilis á Kýpur.

Cube Properties hét áður Novator Properties og var að 69% í eigu þeirra feðga Björgólfs Guðmundssonar og Björgólfs Thor Björgólfssonar gegnum félagið Samson Holding. Þrotabú Samson Holding á nú um 60% af hlutunum í Cube Properties. Kröfuhafar Samson eru svo aftur íslenskir og þýskir bankar ásamt lífeyrisjóðum.