Kínverjar lána orðið meira en Alþjóðabankinn

Kínverjar lána gífurlegar upphæðir til þróunarlanda með það að markmiði að ná haldi á náttúruauðlindum þeirra. Á síðustu tveimur árum hafa Kínverjar lánað þessum löndum meira fé en Alþjóðabankinn.

Fjallað er um málið í Financial Times. Þar segir að árin 2009 og 2010 hafi Kínverjar lánað ríkisstjórnum og fyrirtækjum í þróunarlöndum samtals um 110 milljarða dollara eða hátt í 13.000 milljarða kr. Megnið af þessu fé var lánað í gegnum Þróunarbanka Kína og Export-Import bankans þar í landi.

Til samanburðar má nefna að lán Alþjóðabankans til þróunarlanda á tímabilinu frá miðju ári 2008 og fram á mitt ár í fyrra námu rétt rúmlega 100 milljörðum dollara.

Financial Times segir að stærðin á þessum lánveitingum Kínverja endurspegli meðal annars vilja landsins til að verða óháð vestrænum útflutningsmörkuðum. Raunar gengur það svo langt að sumir hafa ásakað Kínverja um að hafa ryksugað flestar náttúruauðlindir í Afríku.

Fyrir utan þróunarlöndin eru Kínverjar einnig með risavaxna viðskipta- og lánasaminga við lönd á borð við Venesúela, Rússland og Brasilíu. Þeir samningar ganga út á olíuviðskipti.