Frábær veiði í Stóru Laxá

Veiðimenn eru enn að gera frábæra hluti á svæði I&II í Stóru Laxá. Sogsmenn voru þar enn og aftur á ferðinni síðustu 2 daga, enda ekki hægt að fá nóg af veislunni sem hefur verið í gangi þarna í haust. Lönduðu þeir 49 löxum og nokkrir stórir í aflanum, þar á meðal einn 102 cm dreki. Er þetta annar fiskurinn sem þeir veiða í haust á svæðinu sem er yfir 100 cm. Veiðinni er gerð góð skil á heimasíðu Sogsmanna.

Enn eru tvær vikur eftir af veiðitímabilinu í Stóru og áin á miklu skriði. Í gærdag voru 480 laxar komnir á land af neðsta svæðinu en mun færri af efri svæðunum og langflestum hefur verið sleppt. Áin er því enn full af fiski. Ef við fáum góða dembu gæti það hjálpað efri svæðunum í ánni mikið. Þá getum við jafnvel farið að gæla við að metveiði verði í Stóru þetta haustið. Núverandi met er ekki gamalt, það var sett síðasta sumar en þá veiddust 764 laxar í ánni.

Birt með góðfúslegu leyfi Lax-Á