Grikkir kynna nýjan forsætisráðherra í dag

Tilkynnt verður um nýjan forsætisráðherra Grikklands í dag. Samkvæmt grískum fjölmiðlum komust Georg Papandreú, fráfarandi forsætisráðherra og leiðtogi vinstri flokksins Pasok, og Antonis Samaras, leiðtogi hægri flokksins Nýtt lýðræði, að samkomulagi um forsætisráðherra í samsteypustjórn flokkanna í gærkvöldi.

Talið er líklegast að Lúkas Papademos, fyrrverandi aðstoðarbankastjóri Seðlabanka Evrópu, sem á sínum tíma hafði umsjón með upptöku evrunnar í Grikklandi, hafi orðið fyrir valinu. Einnig þóttu þó koma til greina hægrimaðurinn Stavros Dimas, fyrrverandi umhverfisstjóri í framkvæmdastjórn Evrópusambandsins, og Evangelos Venizelos, fjármálaráðherra í stjórn Papandreús.

Papandreú og Samaras ræddust lengi við á símafundi í gær, daginn eftir að þeir náðu samkomulagi um að stjórnarsamstarf. Nýja þjóðstjórnin verður bráðabirgðastjórn. Efnt verður til þingkosninga þann 19. febrúar, en þangað til fær stjórnin það verkefni að tryggja samkomulag á þingi um björgunarpakka Evrópusambandsins og þær aðhaldsaðgerðir innanlands sem honum tilheyra.

Víða má þó enn heyra efasemdir um að stjórninni muni takast að hrinda aðhaldsaðgerðunum í framkvæmd, en í staðinn ætla stærstu bankar Evrópu að fella niður helminginn af skuldum gríska ríkisins, auk þess sem bein fjárhagsaðstoð frá ESB og Alþjóðagjaldeyrissjóðnum verður stóraukin.

Almenningur er orðinn langþreyttur á aðhaldsaðgerðum, sem bitnað hafa illa á fólki í nærri tvö ár. Mótmæli almennings gegn þeim gætu orðið enn harðari nú þegar hægriflokkurinn er kominn til liðs við stjórnina, sami flokkur og safnaði þeim skuldum sem ríkið ræður ekki lengur við að greiða afborganir af.

Samaras og flokkur hans gætu sömuleiðis reynt að ná því fram í stjórnarsamstarfinu að dregið verði úr þessum aðhaldsaðgerðum, í samræmi við stanslausa gagnrýni flokksins á Papandreú mánuðum saman.

Í staðinn gæti svo farið að aðstoð ESB og AGS verði í uppnámi, og þar með stæði Grikkland ansi tæpt á evrusvæðinu.

gudsteinn@frettabladid.is