Stórlaxaveiði á Bíldsfelli

Veiðimenn í Alviðru í Sogi settu í sjö laxa í gærmorgun og lönduðu þremur. Stórlaxaveiði hefur verið í Bíldsfelli síðustu tvo daga.

Það virðist vera nokkuð að ganga af laxi í Sogið þessa dagana. Þeir sem áttu Alviðrusvæðið í gærmorgun höfðu sett í sjö laxa klukkan níu um morguninn. Þremur var landað en athygli vekur að nokkuð er af stórum laxi að ganga um þessar mundir. Í aflanum var þrettán punda lax og tveir af þeim er misstust voru rígvænir.

Þetta kemur heim og saman við veiðina hjá hóp manna í Bíldsfelli. Eftir tveggja daga veiði höfðu þeir landað tólf löxum en þar með er ekki öll sagan sögð. Fimm þessara laxa voru frá 15-20 pund!! Að sögn Ingólfs Ásgeirssonar sem var þar við veiðar minnti veiðin á gamla tíma í Soginu.

Veiðimenn sem voru í Ásgarði höfðu fjórtán laxa upp úr krafsinu og misstu mjög mikið. Virðist sem tökur séu mjög grannar þessa dagana.

Birt með góðfúslegu leyfi SVFR