Söngvari Iron Maiden vill endurreisa Astraeus flugfélagið

Bruce Dickinson söngvari þungarokkshljómsveitarinnar Iron Maiden ætlar sér að endurreisa Astraeus flugfélagið.

Dickinson starfaði sem flugmaður fyrir Astraeus og hann flaug Boeing farþegavél í síðustu áætlunarferð félagsins frá Jeddah í Saudi Arabíu til Manchester fyrr í vikunni þegar Astraeus var lýst gjaldþrota.

Í viðtali við blaðið Guardian segir Dickinson að hann sé að vinna að áætlun um endurreisn flugfélagsins og að hluti af fyrrum starfsmönnum Astraeus vinni með honum að því verkefni. Þá segir þungarokkarinn að nokkrir fjárfestar hafi þegar sýnt málinu áhuga.