Neyðarfundur hjá ríkisstjórn Grikklands

Ríkisstjórn George Papandreou forsætisráðherra Grikklands er nú á neyðarfundi vegna vaxandi pólitískrar óvissu í landinu í kjölfar tilkynningar um að niðurskurðaráform stjórnvalda muni fara í þjóðaratkvæðagreiðslu. Frá þessu er greint á vefsíðu breska ríkisútvarpsins BBC.

Þjóðhöfðingjar um gjörvalla Evrópu hafa í dag lýst yfir áhyggjum sínum af þeirri óvissu sem skapast hefur um stöðu landsins í kjölfar ákvörðunarinnar um að þjóðaratkvæðagreiðslu. Nicolas Sarkozy, forseti Frakklands, lýsti yfir miklum áhyggjum af stöðu mála í ávarpi í dag.

Verð hlutabréfa í Evrópu og Bandaríkjunum lækkaði skarplega, um þrjú til fimm prósent, þó meira í Evrópu. Viðbrögð markaða við stöðunni sem upp er komin í Grikklandi virðast vera þau að fjárfestar trúa tæpast öðru en að miklar niðurskurðartillögur stjórnvalda verði felldar í þjóðaratkvæðagreiðslu.

Þjóhöfðingjar á evrusvæðinu samþykktu á dögunum að stækka björgunarsjóð ESB úr 440 milljörðum evra í þúsund milljarða til að bregðast við vaxandi vanda vegna mikilla ríkisskulda og vanda banka.