Kínverjar ekki tilbúnir að samþykkja þátttöku

Kínverjar voru ekki tilbúnir til þess að taka þátt í fjármögnun á sérstökum björgunarsjóði Evrópusambandsins (ESB) að sinni, a.m.k. ekki fyrr en nákvæmari upplýsingar liggja fyrir um hvernig hann verður byggður upp og síðan notaður. Þetta kemur fram á vefsíðu Wall Street Journal.

Klaus Regling, framkvæmdastjóri sjóðsins, er nú staddur í Japan þar sem hann mun funda með stjórnvöldum um stöðu og hlutverk sjóðsins. Samkvæmt fréttum WSJ standa vonir til þess að Kína, Japan og fleiri Asíuríki muni kaupa skuldabréf sem björgunarsjóðurinn mun gefa út, með það fyrir augum að virkja alþjóðasamfélagið til þátttöku í aðgerðum til þess að tryggja stöðugleika á evrusvæðinu vegna skuldavanda ríkja og fjármálastofnanna.

Þjóðhöfðingjar ríkja í Evrópusambandinu samþykktu sl. miðvikudag að stækka björgunarsjóð ESB úr 440 milljörðum evra í þúsund milljarða evra, til að bregðast við vandanum í Evrópu.