UBS hagnast þrátt fyrir miðlaraskandal

Svissneski bankinn UBS hagnaðist um 1,8 milljarða franka, tæplega 235 milljarða króna, á þriðja ársfjórðungi samkvæmt tilkynningu bankans til kauphallarinnar í New York.

Uppgjörið kom greinendum á óvart þar sem flestir höfðu reiknað með tapi vegna tapsins sem bankinn varð fyrir er einn miðlara bankans tapaði tveimur milljörðum dollara, um 230 milljörðum króna, á heimildarlausum viðskiptum. Málið er enn til rannsóknar hjá bresku lögreglunni.

Þrátt fyrir miklar hremmingar á fjármálamörkuðum undanfarin þrjú ár er staða UBS talin sterk. Þó er enn töluverð óvissa í spilunum vegna krafna frá Bandaríkjastjórn um að svissneskir bankar borgi himinháar sektir vegna aðstoðar þeirra við að skjóta peningum auðmanna undan skatta. UBS hefur þegar þurft að greiða 780 milljónir dollara, tæplega milljarð króna, í sekt vegna þessarar starfsemi bankans.