Útlínur að samkomulagi sagðar liggja fyrir

Þjóðarleiðtogar Evrópuríkja hafa komið sér saman um útlínur að samkomulagi um hvernig bregðast skuli við miklum þjóðarskuldum og slæmri stöðu banka í Evrópu. Frá þessu greindi breska ríkisútvarpið BBC í kvöld. Efnisatriði þess liggja þó ekki fyrir nema að litlu leyti. Fundað hefur verið í Brussell í dag með von um að ná samkomulagi um helstu aðgerðir sem grípa þarf til.

Samkvæmt fréttum BBC, sem er með blaðamenn í Brussell sem fylgjast með viðræðum sem hafa staðið yfir í allan dag, hefur öðru fremur verið rætt um hvernig megi lágmarka skaðann af slæmri stöðu Grikklands, Ítalíu og Spánar.

Þá hefur einnig verið rætt um hvernig megi koma á meiri stöðugleika í fjármálakerfum. Talið er líklegt að afskrifa þurfi í það minnsta 30% af skuldum Grikklands en samkomulag við kröfuhafa landsins í einkageiranum, einkum banka og fjárfestingasjóði, liggur ekki fyrir.

Í frétt BBC í kvöld er tekið fram að líklegt sé talið bankar þurfi að styrkja stöðu sína um 106 milljarða evra til þess að mæta höggum sem eignahlið efnahagsreiknings þeirra verður fyrir, komi til mikilla afskrifta á ríkisskuldum Grikklands og jafnvel annarra ríkja.

Jafnframt er að talið að björgunarsjóður á vegum Evrópusambandsins verði stækkaður mikið úr þeim 440 milljörðum evra sem hann hefur nú til taks. Líklegt er talið að hann verði í það minnsta 1.300 milljarðar evar, samkvæmt fréttum BBC.