Grikkir fái helming skulda sinna afskrifaðan

Í höfuðstöðvum Alþjóðagjaldeyrissjóðsins í Washington leggja menn nú á ráðin um viðamikinn björgunarpakka fyrir ríki evrusvæðisins. Búist er við því að áætlunin sem nú er í bígerð feli í sér að helmingur allra ríkisskulda Grikkja verði afskrifaður auk þess sem björgunarsjóður evrusvæðisins verði fjórfaldaður og telji í framtíðinni 2000 milljarða evra.

Fréttastofa BBC segir að vonast sé til þess að áætlunin verði fullkláruð inna fimm til sex vikna en ljóst sé að hún muni ekki verða samþykkt þrautalaust af öllum aðilum. Á móti kemur að um mikið er að tefla. Takist ekki að rétta úr kútnum gæti stefnt í mikinn samdrátt eða þaðan af verra.

Að sögn breska ríkisútvarpsins hafa fjárfestar hingað til ekki verið ánægðir með stjórnvöld í Evrópu og tilraunir þeirra til að ná tökum á vandamálinu. Að þeirra mati verði að láta verkin tala, orðagjálfur hjálpi lítið á hinum viðkvæmu hlutabréfamörkuðum heimsins.

Hlutabréf héldu áfram að lækka í Asíu við lokun markaða í morgun, Nikkei vísitalan fór niður um 2,2 prósent, Hang Seng vísitalan í Hong Kong lækkaði um 2,4 prósent og í Suður Kóreu lækkaði aðalvísitalan um 2,6 prósent.