Lítið um bombur hjá Bernanke

Þeir sem búist höfðu við því að Ben Bernanke, seðlabankastjóri Bandaríkjanna, myndi tilkynna um róttækar aðgerðir í efnahagsmálum í ræðu sinni í dag urðu fyrir vonbrigðum. Í ræðunni sagði hann að seðlabankinn myndi beita sínum tækjum á viðeigandi máta eins og hann orðaði það til þess að örva hagkerfið. Hann fór hinsvegar ekkert út í smáatriði hvað það varðar en margir höfðu búist við því að tilkynnt yrði um stórfelld kaup á skuldabréfum eða þessháttar aðgerðir.

Í ræðunni viðurkenndi Bernanke að lítill vafi leiki á að því að ástandið í Bandaríkjunum og skuldavandi Evrópuríkja væri mikil ógn við efnahagslegan stöðugleika. Hann staðhæfði hinsvegar að efnahagurinn sé að batna og að til langs tíma litið sé staða bandarísk hagkerfis sterk.