Lítið þarf til að hræða fjárfesta

Hlutabréfamarkaðir í Frakklandi og Þýskalandi féllu um meira en fimm prósentustig í dag eftir að orðrómur um mögulega lækkun á lánshæfismati franska ríkisins komst á kreik. Verulegur ótti er enn á fjármálamörkuðum og lítið þarf til að hræða fjárfesta.

Bandaríski seðlabankinn tilkynnti í gær að hann ætlaði að halda stýrivöxtum sínum í núll prósentstigum til ársins 2013 til að styðja við bandarískt efnahagslíf. Vonast var til að yfirlýsingin myndi róa fjármálamarkaði sem voru í vænum grænum tölum við opnun í Evrópu í morgun. Undir lok dags var hins vegar allt annað uppi á teningnum og dagurinn blóðrauður.

Í Bretlandi lækkaði FTSE vísitalan um rúm þrjú prósent og í Frakklandi og Þýskalandi lækkuðu vísitölur um meira en fimm prósent.

Í Bandaríkjunum var sömu sögu að segja og lækkaði Dow Jones vísitalan um rúm 450 stig við opnun markaða en hefur aðeins rétt úr kútnum þegar líður á daginn. Fjárfestar kenna orðróm um lækkunina.

Þetta sýnir hve óstaðfastur og duttlungafullur markaðurinn er. Hann bregst ekki aðeins við raunverulegum þáttum heldur einnig orðrómi.

Orðrómur komst t.d. á kreik um að Standard & Poor myndi lækka lánshæfi Frakklands. Einnig að franskir og þýskir bankar ættu í erfiðleikum því þeir hafa lánað til fjölmargra ríkja vítt og breitt um Evrópu," segir Keith Bliss, verðbréfasali.

Frönsk stjórnvöld neita orðrómnum en ráðamenn landsins hafa setið neyðarfundi í dag vegna efnahagsástandsins. Því er ljóst að ótti fjárfesta um annað efnahagshrun beggja vegna atlantshafsins er enn til staðar og nú hefur athyglinni aftur verið snúið til Evrópu.