Stórverslunin Illum seld fyrir metfé

Stórverslunin Illum í Kaupmannahöfn hefur verið seld ástralska fjárfestingarsjóðnum Macquarie fyrir 1,64 milljarða danskra kr. eða um 36 milljarða kr. Í blaðinu Börsen segir að um stærstu fasteignakaup í sögu Danmerkur sé að ræða, þ.e. hvað varðar einstaka fasteign.

Illum var áður í eigu Baugs/Landic Property en Landic seldi hana árið 2009 og var þá Straumur (nú ALMC fjárfestingarbanki) meðal kaupenda. Kaupverðið á þeim tíma var ekki gefið upp. Síðan kom Alshair Fiyaz, fjárfestir frá Pakistan, til sögunnar og keypti helmingshlut í Illum á móti Straumi. Í fyrra keypti Fiyaz svo Straum að fullu út úr Illum.

Fram kemur í frétt Börsen að Macquarie eigi fyrir um fjórðungshlut í Köbenhavns Lufthavne en Kastrup flugvöllur er meðal eigna þess félags. Macquarie yfirtekur nú rekstur Illum í samvinnu við Partners Group og fjárfestis frá Kanada.

Claus Bælum einn af eigendum fasteignasölunnar RED Property Advisers, sem sá um söluna á Illum, segir að salan sé merki um að mikill áhugi sé til staðar á norræna markaðinum en margir telji Norðurlönd örugga höfn í þeim óróa sem geisað hefur á alþjóðamörkuðum.