Vill að Írar gefi Norðmönnum helming af olíusvæðum sínum

Þekktur írskur dálkahöfundur hjá blaðinu Irish Times leggur til að Írar gefi Norðmönnum helminginn af olíusvæðum sínum gegn því að Norðmenn sjái alfarið um olíuleit og vinnslu á þeim.

Írar, rétt eins og Íslendingar, eru í djúpri kreppu og gera sér vonir um að olíuleit þar skili árangri. Talið er að það megi vinna allt að 6,5 milljarða tunna af olíu og gífurlegt magn af gasi á hafsbotninum undan vesturströnd Írlands. Þetta er nægilegt magn til að sinna allri orkuþörf Íra í eina öld eða svo.

Dálkahöfundurinn Fintan O´Toole segir að skynsamlegast fyrir Íra sé að gefa Norðmönnum helminginn af þessu auðæfum gegn því að Norðmenn sjái um alla vinnsluna á þeim. O´Toole segir að hann leggi þetta til í alvöru þar sem Norðmenn hafa sannað getu sína til að taka þetta verkefni að sér og að þeir noti hagnaðinn af sínum olíusvæðum í þágu almennings í Noregi.

Svipuð hugmynd hefur komið fram á Alþingi. Í fyrra lagði Gunnar Bragi Sveinsson þingflokksformaður Framsóknarflokksins það til í þingræðu að Norðmönnum yrði falið að annast olíuleit og vinnslu við Ísland.