Búa sig undir að Grikkland verði lýst gjaldþrota

Lönd á evrusvæðinu búa sig nú undir að stóru matsfyrirtækin þrjú lækki lánshæfiseinkunn sína á Grikklandi niður í D eða gjaldþrot. Yrði það í fyrsta sinn sem land innan Evrópusambandsins er lýst gjaldþrota.

Fjallað er um málið á BBC en bæði Moody´s og Standard & Poor´s hafa sagt að endurskipulagning á skuldum Grikklands væri ígildi greiðslufalls og að matsfyrirtækin myndu endurskoða lánshæfiseinkunnir sínar í ljósi þess.

Enginn vafi leikur á að neyðaraðstoðin sem ákveðin var á fundi leiðtoga evrusvæðisins í gærdag felur í sér endurskipulagningu á skuldum Grikklands, það er lánstíminn verður lengdur og vextir lækkaðir. Þá munu skuldir verða felldar niður í einhverjum mæli.

Fari svo að Grikkland fái einkunnina D hefði það víðtækar afleiðingar fyrir bankakerfi Evrópu. Nefna má að bankarnir yrðu að afskrifa tugi milljarða evra af lánum í bókum sínum sem tapað fé og þar með myndi eiginfjárhlutfall þeirra fara undir lögboðin mörk.

Grískir bankar yrðu sennilega gjaldþrota þar sem þeir gætu ekki notað grískar ríkisábyrgðir til að fá lán frá evrópska seðlabankanum. Slíkt hefði svo aftur þau áhrif að gera þyrfti upp hundruðir milljarða dollara af skuldatryggingasamningum.