Volkswagen kynnir nýja kynslóð af bjöllunni

Volkswagen verksmiðjunar hafa kynnt nýja kynslóð af hinni sívinsælu bjöllu sinni.

Segja má að nýja útgáfan af bjöllunni sé töluvert afturhvarf til fortíðarinnar af hálfu hinna þýsku framleiðenda.

Útgáfan líkist því helst að 1967 módelinu af bjöllunni hafi verið skellt upp á teikniborðið og dælt í hana hóflegum skammti af sterum. Mjúku línurnar frá blómatímanum eru sum sé gerðar aðeins harðari og sléttari. Þar að auki er þakið flatt út og vindskeið komin aftan á skottið.

Þessi nýjasta útgáfa bjöllunnar var frumsýnd samtímis á bílasýningum í New York, Berlín og Kína í vikunni. Verðmiðinn á nýju bjöllunni er enn á huldu en áhugasamir kaupendur á Íslandi mega reikna með að geta skoðað gripinn hérlendis í haust.