Verðhækkanir á kaffi gætu farið úr böndunum

Ekkert lát er á verðhækkunum á kaffibaunum á heimsmarkaðinum og nú lítur út fyrir að þær gætu farið úr böndunum. Mikið úrhelli í Brasilíu og Kólombíu ásamt hættu á frosti í Brasilíu valda því að kaffibaunir gætu hækkað um 40%.

Verð á kaffibaunum hefur þegar hækkað um 24% frá áramótum. Verð á Arabica baunum á markaðinum í New York fór í 3 dollara á pundið í gærdag og er það hæsta verð á þessum baunum í 14 ár. Rodrigo Costa aðstoðarforstjóri Newedge segir í samtali við Bloomberg að ef frost skellur á í Brasilíu á næstu dögum gæti staðan á kaffimarkaðinum orðið óbærileg.

Hópur sérfræðinga sem Bloomberg ræddi við um þróunina á kaffimarkaðinum telur að ef frost skellur á í Brasilíu þannig að stór hluti uppskerunnar þar fari forgörðum muni verð á kaffibaunum hækka um 40% í framhaldinu. Miklar rigningar þar að undanförnu hafa þegar skaðað uppskeruna.

Þetta er ekki góðar fréttir fyrir Íslendinga. Íslendingar eru í hópi mestu kaffineytenda í heiminum. Raunar deilda þeir öðru sætinu með Norðmönnum en báða þessar þjóðir nota tæp 10 kíló á kaffi á mann á hverju ári. Finnar eru í efsta sæti en þarlendis eru notuð 12 kíló af kaffi á mann árlega.