Móðurfélag Norðuráls skilaði 7 milljarða hagnaði

Century Aluminium móðurfélag Norðuráls á Grundartanga skilaði tæplega 60 milljón dollara, eða tæplega 7 milljarða króna, hagnaði eftir skatta og fjármagnsliði á síðasta ári.

Þetta er mikill viðsnúningur í rekstri félagsins þar sem það tapaði tæplega 206 milljónum dollara árið áður.

Í ársuppgjöri félagsins kemur fram að eignir þess nema nú rúmlega 1,9 milljörðum dollara eða um 218 milljörðum króna. Hafa þær aukist um rúmlega 50 milljónir dollara milli ára.

Afkoman endurspeglar hækkandi álverð milli tveggja síðustu ára. Þannig fékk félagið að meðaltali tæplega 2.300 dollara fyrir áltonnið í fyrra á móti rúmlega 1,700 dollurum árið áður.