Skilanefndir gætu fengið 9 milljarða frá All Saints

Breska tískuverslunarkeðjan All Saints er til sölu og verðmiðinn hljóðar upp á 140 milljónir punda. Skilanefndir Kaupþing og Glitnis gætu fengið um 9 milljarða kr. út úr sölunni á All Saints.

Fjallað var um málið í breskum fjölmiðlum um helgina. Í The Press Association segir að eigendur All Saints hafa fengið Ernst & Young til að vera ráðgjafar við söluna. All Saints er í meirhlutaeigu Kevin Stanford en Kaupþing og Glitnir halda á um 35% eignarhlut sem áður var í eigu Baugs.

Miðað við framangreinda verðhugmynd myndu Kaupþing og Glitnis fá tæpar 50 milljónir punda úr sölunni eða sem nemur rúmum 9 milljörðum kr. All Saints rekur nú yfir 100 verslanir í Bretlandi, Evrópu, Bandaríkjunum og Rússlandi.

Fram kemur í breskum fjölmiðlum að fleiri breskar verslunareignir sem nú eru í eigu skilanefnda íslensku bankanna séu á leið á markaðinn. Verið sé að endurskipuleggja rekstur þeirra með það að markmiði að gera þær söluhæfari. Sem dæmi er verslunarkeðjan Iceland Foods nefnd sem og Aurora og House of Fraser.