Jon Bon Jovi þénaði mest

Bandaríski tónlistarmaðurinn Jon Bon Jovi þénaði mest á tónleikum á árinu eða rúmlega 200 milljónir. Hljómsveit hans tróð upp 80 sinnum á árinu.

Tónleikaför hljómsveitar Bon Jovi skilaði miklum tekjum eða rúmlega 200 milljónum Bandaríkjadollara. Það eru um 24 milljarðar íslenskra króna. Samkvæmt árlegu yfirliti tímaritsins Pollstar þénaði ástralska þungarokksveitin AC/DC 177 milljónir dollara og í þriðja sæti listans eru írsku rokkrisarnir í U2 en sveitin skilaði mestum tekjum á síðasta ári. Í ár þénaði sveitin um 160 milljónir dollara. Söngkonan Lady Gaga er í fjórða sæti listans og hljómsveitin Metallica er í því fimmta.

U2 tróð upp á 32 tónleikum, AC/DC á 40 og hljómsveit Bon Jovi kom fram á 80 tónleikum. Á einum þeirra meiddist söngvarinn á kálfa en hann lét það ekki á sig fá og lauk tónleikunum, þrátt fyrir að hafa þurft að haltra um sviðið.

Árið hefur verið annasamt hjá Bon Jovi en nýverið skipaði Barack Obama, Bandaríkjaforseti, tónlistarmanninn í nefnd sem ætlað er að veita Hvíta húsinu ráðgjöf um aukið samstarf fyrirtækja, hjálpar- og góðgerðarsamtaka, almennings og stjórnvalda.