Kampavín upp á 7,5 milljónir flaskan fannst í skipsflaki

Kafarar sem sérhæfa sig í leit að skipsflökum duttu nýlega í lukkupottinn í Eystrasalti nálægt Álandseyjum. Þar fundu þeir hátt í 200 ára gamalt skipsflak sem fulllestað var með eðalkampavíni. Talið er að flaskan af því seljist á 50.000 evrur eða 7,5 milljónir kr.

Kampavínið sem hér um ræðir er af tegundunum Veuve Clicquet (Gula ekkjan) og Juglar og það er enn í drykkjarhæfu ástandi, raunar mjög góðu ástandi að sögn þeirra sérfræðinga sem fengið hafa að bragða á því. Það hefur legið í ísköldum sjó og fengið að þroskast allan þennan tíma. Talið er að skipið hafi farist um miðja nítjándu öld en um er að ræða 23 metra langt tréskip sem var á leið til Pétursborgar.

Í frétt um málið í Financial Times segir einn af köfurunum, Christian Ekström, að þegar hann var á leið upp frá flakinu með fyrstu kampavínsflöskuna í hendinni þurfti hann að halda niðri korktappanum svo hann skytist ekki af. „Þegar ég kom með þessa flösku upp á yfirborðið töldum við að hún væri full af sjó. En þegar við opnuðum hana vissum við að við höfðum fundið eitthvað sérstakt," segir Ekström.

Veuve Clicquet er enn framleitt undir því merki en framleiðslu Juglar var hætt árið 1929. Ekki er getið um hver margar flöskur fundust heilar í flakinu en þær fara bráðlega á uppboð.

Fyrra verðmet fyrir staka flösku af kampavíni var sett í Hong Kong í fyrra. Þá var flaska af Krug frá árinu 1928 seld á uppboði fyrir 2,4 milljónir kr.