Bill Gates orðinn viðskiptafélagi Kaupþings

Bill Gates, stofandi Microsoft og auðugasti maður heimsins, er orðinn viðskiptafélagi slitastjórnar Kaupþings í gegnum bresku íþróttavörukeðjuna JJB Sports. Samkvæmt tilkynningu frá JJB Sports hefur Bill and Melinda Gates Foundation Trust ákveðið að taka þátt í að styrkja fjárhagslegan grundvöll JJB Sports um 31,5 milljón punda eða um 5,7 milljarða kr.

Slitastjórn Kaupþings heldur utanum tæplega 30% hlut í JJB Sports en sá hlutur var áður í eigu Chris Ronnie fyrrum forstjóra JJB Sports og Exista. Upphaflegu kaupin á þeim hlut eru m.a. til rannsóknar hjá Serious Fraud Office, efnahagsbrotadeild bresku lögreglunnar.

Í frétt um málið á Reuters segir að JJB Sports eigi í fjárhagslegum erfiðleikum og að Bill and Melinda Gates Foundation Trust hafi ásamt þremur öðrum fjárfestum í keðjunni ákveðið að leggja henni til nýtt fé. Samtals fer þessi hópur með rúmlega 44% eignarhlut í JJB Sports, þar af á sjóður Bill Gates og Melindu um 5%.

Fram kemur á Reuters að áður en þetta nýja fé kom til var JJB Sports í hættu á að brjóta skilamála á 25 milljón punda láni frá Royal Bank of Scotland. Keðjan hafði gefið út aðvörun um slíkt fyrir mánuði síðan. Bankinn féllst á að gjaldfella ekki lánið þegar lá ljóst fyrir að nýtt fé væri á leið inn í keðjuna.

Hlutir í JJB Sports hafa tapað um 83% af gildi sínu á liðnu ári en hækkuðu um 20% s.l. föstudag þegar tilkynnt var um fjárinnspýtinguna.