Disney opnar verslun á Strikinu í Kaupmannahöfn

Disney mun opna fyrstu verslun sína á Norðurlöndunum á næsta ári. Hún verður staðsett við Strikið í Kaupmannahöfn.

Fjallað er um málið á business.dk. Þar segir að verslunin verði opnuð næsta vor en það er The Walt Disney Company Nordic sem stendur á bakvið hana. Í tilkynningu frá félaginu segir m.a. að í versluninni verði nýjasta tækni til staðar ásamt úrvali af einstökum vörutegundum.

Disney verslanir eru til víða um heiminn en flestar þeirra eru staðsettar í Bandaríkjunum og Japan. Eins og nafnið bendir til selja þær vörur og leikföng sem tengjast annarri starfsemi Disney og þá einkum kvikmyndagerð.

Fram kemur í umfjöllun business.dk að opnun verslunarinnar í Kaupmannahöfn sé fyrsti áfanginn í nýrri markaðssókn Disney á Norðurlöndunum.