Royal Unibrew býður ekki í bruggverksmiðju í Eþíópíu

Næststærsta brugghús Danmerkur, Royal Unibrew, er eitt af fimm brugghúsum sem boðið hefur verið að bjóða í ríkisrekna bruggverksmiðju í Eþíópíu. Meðal annarra sem keppa um þessa verksmiðju eru Heineken, SABMiller og Diego.

Eins og áður hefur komið fram heldur Straumur enn á 4,99% hlut í Royal Unibrew og Stoðir eiga tæplega 6%.

Greint var frá málinu á Bloomberg fréttaveitunni sem aftur vitnaði í eþíópska blaðið Fortune en visir.is greindi frá því í morgun. Þar segir að verksmiðjan sem hér um ræðir, Meta Abo Brewery, framleiði um 60 milljónir lítra af bjór á ári og sé næststærsti aðilinn á bjórmarkaðinum í Eþíópíu.

Nú hefur forstjóri Unibrew sagt við danska fjölmiðla að ekkert sé hæft í þessari frétt Fortune og þeir séu ekki að reyna að kaupa þessa bruggverksmiðju. Hinsvegar sé Royal Unibrew að ná sér á strik aftur eftir fjármálakreppuna og sé að líta eftir tækifærum á markaðinum.

Nordea Markets breytti nýlega verðmati sínu á hlutum í danska brugghúsinu Royal Unibrew og hækkaði það verulega. Nordea hefur hækkað mat sitt úr 275 danskar kr . á hlut upp í 310 danskar kr. á hlut.

Í umfjöllun um verðmat Nordea á business.dk í síðasta mánuði segir að Royal Unibrew muni birta endurmat á væntingum um hagnað ársins í ár þann 25. nóvember . Nordea reiknar með að við það tækifæri muni brugghúsið tilkynna um vænar arðgreiðslur til hluthafa á næsta ári.

Í ársfjórðungsuppgjörum brugghússins í ár hefur verið greint frá því að væntingar eru um allt að 255 milljón danskra kr. eða yfir 5 milljarða kr. hagnað eftir árið.