Álverðið tekur kipp upp á við fyrir jólin

Heimsmarkaðsverð á áli hefur hækkað um rúmlega 100 dollara á tonnið í þessari viku og stendur nú í 2.455 dollurum á tonnið miðað við þriggja mánaða framvirka samninga. Er verðið því nálægt hámarki ársins.

Heimsmarkaðsverð á áli í ár náði hæst í tæpa 2.500 dollara á tonnið í apríl s.l. Hafði verðið þá ekki verið hærra síðan sumarið 2008. Síðan hrapaði verðið á skömmu tíma niður í rúmlega 1.850 dollara í júní. Frá þeim tíma hefur verðið síðan farið stighækkandi, með litlum niðursveiflum inn á milli eins og sjá má á línuritinu með þessari frétt en línutritið er tekið af heimasíðu LME.

Það er athyglisvert að hópur 24 sérfræðinga sem Bloomberg leitaði álits hjá skömmu fyrir áramótin síðustu taldi að álverðið á þessu ári myndi verða 1.885 dollarar á tonnið á markaðinum í London (LME) að meðaltali. Í raun liggur meðalverð ársins í kringum 2.200 dollara á þessum markaði.