ATP og PFA taka mikla áhættu með kaupum á FIH bankanum

Í ritinu segir að áhættan sé að mestu leyti fólgin í því að á næstu þremur árum þarf að endurfjármagna alþjóðlega skuldabréfaútgáfu FIH upp á 50 milljarða danskra kr. eða um 1.000 milljarða kr. FIH fór í þessa útgáfu í krafti ríkisábyrgðar í gegnum bankpakke I. Ríkisábyrgðin rennur út um næstu mánaðarmót.

Ökonomisk Ugebrev segir að þessi endurfjármögnun verði verulega erfið í ljósi þess að lánshæfiseinkunn FIH liggur nálægt svokölluðum ruslflokki í dag og því hefur bankinn aðeins tvö ár til að breyta henni í A eða AA.

Raunar hefur komið fram að bankastjóri FIH er bjartsýnn á að lánshæfiseinkunn bankans muni hækka töluvert í ljósi þess að fjársterkir aðilar eru komnir með eignarhald hans í sínar hendur. ATP og PFA eru stærstu lífeyrissjóðir Danmerkur og báðir hafa yfir digrum sjóðum að ráða.

Ökonomisk Ugebrev segir að takist ekki að hífa upp lánshæfismat FIH og þar með auðvelda endurfjármögnun fyrrgreindra skuldabréfa muni ATP og PFA neyðast til að leggja bankanum til aukið fjármagn. Slík fjárútlát gætu svo aftur haft áhrif á eiginfjárstöðu lífeyrissjóðanna sjálfra.