Alcoa fékk skell í kauphöllinni á Wall Street

Alcoa, móðurfélag Fjarðaráls, fékk skell í kauphöllinni á Wall Street í gærkvöldi eins og mörg önnur félög en þá tók Dow Jones vísitalan mestu dýfu á einum degi á síðustu þremur mánuðum.

Í frétt um málið í Börsen segir að Alcoa hafi orðið hvað harðast úti á Wall Street en hlutir í félaginu lækkuðu um 2,8%.

Ástæður dýfunnar á Wall Street eru áhyggjur fjárfesta af því að áform kínverska stjórnvalda um að draga úr hagvexti þar í landi með því að hækka vexti muni þýða minni eftirspurn eftir hrávörum þar á meðal áli. Heimsmarkaðsverð á áli á markaðinum í London endurspeglar þessar áhyggjur. Álverðið stendur nú í 2.356 dollurum á tonnið og hefur lækkað um 100 dollara á einni viku.

Önnur hrávara lækkaði einnig töluvert í gærdag, til að mynda lækkaði olíuverðið um nær 3% og gullverðið um 2,2%.

Dow Jones vísitalan lækkaði um 1,6% og stendur í rétt rúmum 11.000 stigum. Nasdaq lækkaði um 1,8% og S&P 500 vísitalan um 1,6%.